Bloomberg: ABŞ Rusiya ordusunun Starlink peyk terminallarından qeyri-qanuni istifadəsini əngəlləyib

"Bloomberg" xəbər verir ki, İlon Maskın SpaceX şirkətindən Ukrayna ilə birlikdə işləyən Pentaqon əməkdaşları Rusiya hərbçiləri tərəfindən "Starlink" peyk rabitə terminallarından qanunsuz istifadənin qarşısını ala biliblər.

Ukrayna ordusu bu terminalların çoxundan cəbhədə istifadə edir və Rusiya ordusunun bir müddətdir ki, onlardan öz ehtiyacları üçün istifadə edə bildiyi bildirilir.

ABŞ Müdafiə Nazirinin Kosmik Məsələlər üzrə müşaviri Con Plamb "Bloomberg"ə bildirib ki, Rusiya hərbçilərinin sistemə icazəsiz giriş problemi həll olunub.

“Biz bu günə qədər rusların [terminallardan] istifadəsini uğurla dayandırdıq, lakin mən əminəm ki, Rusiya Starlink və digər kommersiya kommunikasiya sistemlərindən istifadə yollarını axtarmağa davam edəcək”, deyə Plamb bildirib.

Nəşr bildirir ki, bəzi rus saytları Starlink terminallarını reklam etməyə davam edir, onların satıcıları isə belə hallarda abunələrin Avropa ölkələrinin sakinlərinə verildiyini bildirirlər. Yazırlar ki, sistem Rusiyanın daxilində işləməyəcək, sərhədyanı ərazilərdə, o cümlədən Ukraynanın işğal olunmuş ərazilərində rabitəyə imkan verəcək.

"Lakin bu həftə rusiyalı Starlink istifadəçiləri rabitə problemlərindən şikayət etməyə başladılar", deyə "Bloomberg" yazır.

Nəşr xatırladır ki, 2022-ci ilin may ayına qədər Ukrayna 10 min Starlink terminalı alıb. Pentaqon daha sonra "SpaceX"-lə 23 milyon dollar dəyərində illik müqavilə bağladı; Bloomberg əlavə edir ki, onun müddəti bu ilin may ayında başa çatır.

Ülviyyə, Hurriyyet.az