Netanyahu:”Biz dayanmayacayıq” 

Mayın 9-da İsrail qüvvələri Qəzza zolağının cənubundakı Rəfah şəhərini bombalayıb. Eyni zamanda, Qahirədə atəşkəslə bağlı dolayı danışıqlar dayandırılıb. Vətəninfo.az-ın  məlumatına görə , bu barədə “Reuters” agentliyi məlumat yayıb.

İsrail rəsmisi mediaya bildirib ki, Fələstinin HƏMAS radikal hərəkatının təklifi ilə bağlı İsrailin qeyd-şərtləri var.

İsrailin baş naziri Benyamin Netanyahu da öz növbəsində ABŞ-ın silah tədarükünü dayandırması ilə bağlı xəbərdarlıqlarına cavab verib.

Netanyahu videomüraciətində “Lazım gələrsə, dırnaqlarımızla döyüşəcəyik, amma dırnaqlarımızdan daha çoxumuz var” dedi.

Mayın 8-də ABŞ prezidenti Co Bayden ilk dəfə olaraq İsrailə açıq şəkildə xəbərdarlıq edib ki, İsrail qüvvələri Rəfahı işğal edərsə, Vaşinqton silah tədarükünü dayandıracaq. Lakin bu xəbərdarlıq nəticə vermədi, çünki mayın 9-da İsrail tankları artıq Rəfahın şərq ətrafına yaxınlaşmışdı. Mayın 7-də isə İsrail tankları Misir sərhədindəki Rəfah keçid məntəqəsini zəbt edib.

İsrail Müdafiə Qüvvələrinin sözçüsü Rəfahdakı əməliyyatlar, eləcə də planlaşdırılan digər əməliyyatlar üçün lazımi silahlara malik olduqlarını bildirib.

Keçən həftə Bayden, Vaşinqtonda Rafahda istifadə olunacağından qorxduğu üçün İsrailə 3500 bomba tədarükünün dondurulması haqqında sərəncam imzaladı.

Oktyabrın 7-də HƏMAS yaraqlılarının işğalından sonra İsraildə 1200 adam öldürülüb, 250-yə yaxın insan isə əsir götürülüb. İsrailin son məlumatlarına görə, Qəzza zolağında 128 girov qalıb, 36 girov ölüb.

Yerli hakimiyyət orqanlarının məlumatına görə, Qəzza zolağında İsrailin cavab hərbi əməliyyatları zamanı təxminən 35 min fələstinli həlak olub, 80 min nəfər isə yaralanıb.