Almaniyada şirkətlərin iflası 28% artıb

Almaniya iqtisadiyyatındakı tənəzzül və yüksək faiz xərcləri səbəbindən aprel ayında şirkətlərin iflası 28,5 faiz artıb.

İqtisadiyyat.az xəbər verir ki, bu barədə Almaniya Federal Statistika İdarəsi (Destatis) aprel ayı üçün iflas məlumatlarını açıqlayıb.

Məlumata görə, ötən ay iflas müraciətləri illik müqayisədə 28,5% artıb. Mart ayında ölkədə şirkətlərin müflisləşməsi 12,3% artıb. Bu ilin fevral ayında iflas edən müəssisələrin sayı isə 31,1% artaraq 1785-ə çatıb. Ən çox iflas edən şirkətlər isə nəqliyyat, istehsal və tikinti sektorlarına aiddir.

Almaniya iqtisadiyyatı, alıcılıq qabiliyyətinə təsir edən yüksək inflyasiya, artan enerji qiymətləri, azalan investisiyalar, zəif xarici tələb və yüksək faiz dərəcələri səbəbindən keçən il 0,3% kiçilib. Bununla da Almaniya "G7" ölkələri arasında kiçilən yeganə ölkə olub.

Gözəl Həşimova