“The Times” Olimpiadada terror hücumu riskinin yüksək olduğunu bildirib

Fransanın Thales konserni tərəfindən 350 milyon avroya hazırlanmış və 2024-cü ildə Parisdə keçiriləcək Olimpiya Oyunlarında istifadə üçün nəzərdə tutulmuş pilotsuz uçuş aparatlarının aşkarlanması və zərərsizləşdirilməsi üçün Parad sistemi kifayət qədər effektiv olmayıb.

NOCOMMENT.az xəbər verir ki, Britaniyanın “The Times” qəzetinin yazdığına görə, sistem əhalinin sıx məskunlaşdığı şəhər ərazilərində yalnız hər üç pilotsuz təyyarədən birini aşkar etməyə qadirdir ki, bu da pilotsuz təyyarələrdən istifadə etməklə mümkün terror hücumları riskini artırır.

Məsələ ilə bağlı çıxış edən ekspertlər deyirlər ki, Parade hələlik “üstün” təhlükəsizlik sistemi sayıla bilməz. Lakin çatışmazlıqlarına baxmayaraq, o, Olimpiya Oyunları zamanı təhlükəsizliyi təmin etmək üçün istifadə olunan bir neçə sistemdən biri olacaq. Bundan əlavə, tədbirdə pilotsuz nəqliyyat vasitələrini idarə etmək üçün Britaniyanın elektron tıxanma sistemlərindən də istifadə olunacaq.

Qəzetin yazdığına görə, ötən ilin payızında Fransada keçirilən Reqbi üzrə Dünya Kuboku zamanı Parad artıq təhlükəsizlik üçün istifadə edilib. Tədbir zamanı sistem operatorlar tərəfindən müvafiq icazə olmadan dronlardan qanunsuz istifadə ilə bağlı 55 fakt müəyyən edib.