Avropa İttifaqı (Aİ) institutlarının, hökumətlərinin, müdafiə sənayesi müəssisələrinin, beynəlxalq təşkilatların nümayəndələri Ukrayna ilə hərbi əməkdaşlığı gücləndirmək üçün Brüsseldə keçirilən forumda bir araya gəliblər.
Ukrayna ilə bağlı əməkdaşlığın gücləndirilməsi və silah-sursat istehsalının artırılmasının müzakirə olunduğu toplantıya Aİ-nin Xarici işlər və təhlükəsizlik siyasəti üzrə Ali Nümayəndəsi Josep Borrell ev sahibliyi edir.
Borrell forumun əvvəlində deyib: “Əlbəttə, Ukrayna müharibə şəraitində olan ölkədir. Rusiya işğalından müdafiə olunmaq üçün sənaye potensialını, müdafiə qabiliyyətini və istehsalı artırmaq imkanlarını hədəfləyir. Biz Ukraynanın müdafiə imkanlarını sənaye nöqteyi-nəzərindən özümüzlə birləşdirməliyik”.
"Məqsədimiz Ukrayna silahlı qüvvələri üçün müttəfiq ölkələrin müdafiə sənayesindən satınalmalar üçün əlavə maliyyə tapmaqdır", - deyə Ukraynanın strateji sənaye naziri Aleksandr Kamışin bildirib.
Forumda Avropa İttifaqına üzv 25 ölkədən 140-dan çox müdafiə sənayesi müəssisəsi iştirak edir.
“AzPolitika.info”
