Prezident Salome Zurabişvili ölkədə baş verənlərlə bağlı Avropa İttifaqına üzv ölkələrin səfirləri ilə görüşüb.
Tezadlar.az Gürcüstan mediasına istinadla xəbər verir ki, Orbeliyani sarayında keçirilən görüşdə prezident Aİ-yə üzv ölkələrin Gürcüstanın Avropa yoluna dəstəyinin əhəmiyyətindən danışıb və səfirlərə göstərdikləri səylərə görə təşəkkür edib. Prezident deyib ki, səfirlər Gürcüstan əhalisinə sabitliyi, Gürcüstanın tək olmadığını, ölkənin Avropaya inteqrasiya istiqamətində irəlilədiyini davamlı göstərməlidir: “Şənbə günü, bizim üçün Pasxadan bir gün əvvəl, sizin üçün isə istirahət günü gəldiyiniz üçün təşəkkür edirəm. Mən bu tip görüşləri mütəmadi olaraq keçirmək istərdim ki, vacib bir mərhələdə mövcud vəziyyət barədə sizə məlumat verə bilim. Mən hökumətlərinizə və rəsmi nümayəndələrinizə Gürcüstanı və Gürcüstanın Avropa yolunu dəstəkləyən bəyanatlarına görə təşəkkür etmək istəyirəm. Doğrudan da, Gürcüstanın Avropa yolu Gürcüstanın yeganə yolu olaraq qalır (bizim konstitusiyamızda belə yazılıb) və mən konstitusiyanı müdafiə edirəm və eyni zamanda ictimaiyyətin səsini, küçələrdə dinc və çox məsuliyyətlə dayanan gənclərin səsini, eyni zamanda küçələrdə olmayan qalan əhalinin səsini də təmsil edir və müdafiə edirəm. Demək istəyirəm ki, bu gün baş verənlərin, sabah və ya o biri gün baş verənlərin məsuliyyəti ölkə hakimiyyətinin üzərinə düşür, çünki bu hadisələr zəncirini onlar törədiblər. Bütün ölkə Avropa yolu ətrafında birləşəndə, biz namizəd statusu alanda, futbol komandamız Avropa çempionatına vəsiqə alanda, hökumətimiz bu qədər təxribatçı “xarici agentlər” qanununu və digər qanunları yenidən gündəmə gətirdi. Mən bu qanun layihələrini bir-birinin ardınca veto qoyuram, çünki onlar ilin sonuna qədər (yaxud tezliklə) danışıqlara başlayacağımız təqdirdə həyata keçirməli olduğumuz tövsiyələrə ziddir. Beləliklə, bunu etmək [bu qanunu yenidən tətbiq etmək] özlüyündə Aİ-yə qapının açıq olduğunu görməkdən xoşbəxt olan cəmiyyətə qarşı təxribat idi. Biz həm də tərəfdaşlarımıza hücum gördük və mən sizin ölkələrinizə qarşı işlədilən sözlərə görə üzr istəmək istəyirəm. Siz o ölkələrsiniz ki, 30 ildən artıqdır - 33 ildir ki, bu ölkənin hər cür inkişafına, dövlət qurumlarına, iqtisadi infrastrukturuna, mədəni infrastrukturuna, gürcü kimliyinin qorunmasına dəstək verirsiniz; Ölkələrinizin, qeyri-hökumət və ya özəl təşkilatlarınızın həyata keçirdiyi bütün proqramlar Gürcüstanın marağında olub. Bu, Gürcüstan xalqının çox yaxşı bildiyi bir şeydir, ona görə də xalqın adından buna görə sizə rəsmi şəkildə təşəkkür etmək istəyirəm. Mənim xahişim odur ki, bu müddət ərzində, mayın sonuna qədər yüksək səviyyəli səfərlər həyata keçirilsin, ondan sonra bilirəm ki, avropalılar üçün başqa bir dövr - Avropa parlament seçkiləri başlayır”, - deyə S. Zurabişvili bildirib.
.jpg)
