Macarıstan: ABŞ Rusiya-Ukrayna münaqişəsində öz maraqlarını güdür

Macarıstanın baş naziri Viktor Orbanın siyasi müşaviri Balazs Orban bəyan edib ki, ABŞ Rusiya ilə Ukrayna arasındakı münaqişədə öz maraqlarını güdür və bu səbəbdən münaqişənin bitməsinə mane olub.

Editor.az xəbər verir ki, bu barədə Macarıstanın baş naziri Viktor Orbanın siyasi müşaviri Balazs Orban amerikalı jurnalist Taker Karlsona müsahibəsində deyib.

ABŞ dövlət katibi Antoni Blinkenin bütün bunlara baxmayaraq, niyə III Dünya Müharibəsini davam etdirdiyini soruşduqda Orban, ABŞ-ın mövcud vəziyyətdən faydalanmağa çalışdığını bildirib və bu cür qiymətləndirmə edib: “Bəzi taktiki üstünlüklər var. Məsələn, siz Rusiyanı zəiflətmək istəyirsiniz. Bu, ABŞ üçün həmişə prioritet məsələdir. Siz Almaniya-Rusiya enerji əməkdaşlığını dayandırmaq istəyirsiniz. Bu, həmişə prioritetin bir hissəsidir. Siz mayeləşdirilmiş təbii qazınızı ixrac etmək üçün bazarlar axtarırsınız. Bu, ABŞ üçün həmişə prioritetdir. Mən kiçik taktiki üstünlüklərdən danışıram. Amma strateji baxımdan bütün bunlar iqtisadi güc olan Avropanı məhv edir”.

ABŞ elitasının Mərkəzi Avropadan Rusiyaya qarşı silah kimi istifadə etmək istədiyi fikrini bildirən macar siyasətçi sözlərini belə davam etdirib: “Düşünürəm ki, Vaşinqtondakı liberal elitanın təklifi Mərkəzi Avropa ölkələrindən ruslara qarşı nizənin ucu kimi istifadə etməkdir. Bilirsiniz, bir növ ondan son çarə kimi istifadə etmək istəyirlər. Biz son çarə olmaq istəmirik. Biz Şərqlə Qərb arasında ticarət yollarının mərkəzində yerləşən unikal mövqeyimiz sayəsində regionun əsas ölkəsi olmaq istəyirik. Biz Rusiya ilə sülh şəraitində yaşamaq istəyirik. Bu, xüsusilə enerji və iqtisadi əməkdaşlıq sahələrində yaxşı işləyir”.

//Gülnarə Abasova, Editor.az