Xəyalın reallaşan xəyalı: “Bu, məsuliyyətdən qaynaqlanan həyəcan idi”

“Sumqayıt”ın gənc qapıçısı Xəyal Fərzullayevin futbolinfo.az saytına müsahibəsi

– “Qarabağ”la görüşdə “Sumqayıt”ın əsas komandasında ilk oyuna çıxdınız. Debüt matçınızı necə dəyərləndirirsiniz?

– Hər bir futbolçu debüt gününün xəyalı ilə yaşayır. Mən də bu günün arzusunda idim. Öz şəhərimdə, öz doğma komandamda və dolu tribunalar qarşısında xəyalım gerçək oldu. Sadəcə, möhtəşəm idi.

– Debüt matçının “Qarabağ” kimi güclü komandaya qarşı olması üzərinizdə əlavə təzyiq, həyəcan yaradırdı?

– Əlbəttə, rəqibin adı, komandamın turnir cədvəlindəki yeri, doğma azarkeş amili həyəcan yaradırdı. Amma bu, məsuliyyətdən qaynaqlanan həyəcan idi. Çox şükür, bu həyəcanı ilk dəqiqələrdən geridə qoyub oyuna köklənə bildim.

– Matçdan sonra məşqçilər korpusu çıxışınız haqda nə dedi?

– Oyun günü həm məşqçilər, həm də komanda yoldaşlarım mənə çox dəstək oldular. Onlara öz təşəkkürümü bildirirəm. Məşqçilərimin güvənini qazanmaq, onları razı salmaq üçün çox çalışmalıyam. Bunun üçün əlimdən gələni edəcəyəm.

– Baş məşqçi Samir Abasov Barselonada səfərdə olduğu üçün “Qarabağ”la görüşə komandanı o çıxarmamışdı. Abasovla debütünüz haqda danışmısınız?

– Baş məşqçimiz Samir Abasovla danışmaq fürsətim hələ olmayıb. Həm Samir müəllimə, həm də qapıçılar üzrə məşqçimiz Anar Niftəliyevə mənə bu şansı yaratdıqları üçün təşəkkür edirəm.

– Sizi “Sumqayıt”ın növbəti oyunlarında da görə biləcəyik?

– Mənim vəzifəm məşqlərimi ən yaxşı şəkildə etmək, məşqçilərimə hazır olduğumu göstərməkdir. Qalan məsələlərə onlar qərar verirlər.

– “Sumqayıt” son qələbəsi ilə ikinci yer uğrunda mübarizə apardığını bir daha təsdiqlədi. Hədəfə çatmaq mümkün olacaq?

– İnancımızı heç vaxt itirməmişik və itirməyəcəyik. Komandamızın sona qədər vuruşacağına və bunu bacaracağına tam olaraq inanıram.

– Gənc qapıçı kimi dünya və Azərbaycan futbolunda hansı qolkiperləri özünüzə kumir seçmisiniz?

– Dünya futbolundakı kumirlərim Ederson və Alisson Bekkerdir. Azərbaycan futbolunda isə Şahruddin Məhəmmədəliyev və Emil Balayevi bəyənirəm.

FƏRİD