"O qızı geyiminə görə qovmağa heç kimin haqqı yoxdur" - Novella Cəfəroğlu

“Hər bir insanın özünün geyinmək hüququ var. Geyim məsələsi qadının özündən, ailəsindən asılıdır. Burda qızı mağazadan qovmaqla iş bitmir. Məsələ ondadır ki, televiziyalarda artistlərimiz açıq-saçıq geyimləri ilə min hoqqadan çıxırlar. Bizim gənclərimiz də bunu onlardan götürürlər. Amma ailələrdə tərbiyə məsələsi qaldırılmalıdır və mentalitetimizə uyğun geyinmək lazımdır. Bu gün cəmiyyət elə bir vəziyyətdədir ki, geyimə görə boşanmalar artır, ərlə arvadın sözü çəp gəlir. Ailələrin çoxunda qızlar özlərini sərbəst aparmaq istəyirlər. Bunun üçün də bu məsələlər ailə daxilində həll olunmalıdır. Geyiminə görə qızı ictimai yerdən qovmağa heç kimin haqqı yoxdur.

Bu problemləri mətbuat olaraq sizlər ictimailəşdirməlisiniz. Əgər ailədə necə geyinməsiylə bağlı qıza tənbeh yoxdursa, cəmiyyətdə bu cür hallarla rastlaşacağıq. Mən şəhərə çıxanda görürəm ki, gözəl qızlar var, amma dodaqlarını, arxalarını şiridib gəzirlər. Axı sən gözəl qızsan, niyə indidən bu cür əməliyyatlar etdirirsən? Çünki bu günki dəblə ayaqlaşmaq istəyir. Ona görə də ailələr buna nəzarət etməlidir”.