Aqrar sığorta ekspertlərinin hazırlığı üzrə təlimlər keçirilib

Bakı, 26 aprel, AZƏRTAC

Aprelin 15-dən 23-dək Aqrar Sığorta Fondunda bitkiçilik və heyvandarlıq mütəxəssisləri üçün aqrar sığorta təlimləri keçirilib.

Fonddan AZƏRTAC-a bildirilib ki, yerli və türkiyəli ekspertlərin iştirakı ilə keçirilən təlimlərə 60-a yaxın yerli mütəxəssis cəlb olunub. Təlimlər risk qiymətləndirməsi, sığorta hadisəsinin araşdırılması, zərəri müəyyən etmək, Aqrar Sığorta İnformasiya Sistemində iş və rəylərin yazılması kimi məsələləri əhatə edib.

Azərbaycanda dövlət dəstəyi ilə tətbiq edilən aqrar sığorta sistemində aqrar sığorta ekspertləri mühüm yer tutur. Ekspertlər sığortalanan təsərrüfatlara baxış keçirir, eləcə də sığorta hadisəsi baş verdikdə səbəbini araşdırır və zərəri hesablayırlar.

Təsərrüfatlarının sığortalanması və zərərin ödənilməsi ilə bağlı qərarlar müstəqil aqrar sığorta ekspertlərinin rəyi ilə qəbul edilir.

Son illər Azərbaycanda aqrar sığortaya marağın böyüməsi – sığortalanan təsərrüfatların sayının kəskin artması, eləcə də iqlim dəyişiklikləri nəticəsində sığorta hadisələrinin çoxalması ilə aqrar sığorta ekspertlərinə tələbat da yüksəlib.

Təlim prosesinin praktik hissəsi “Grand Agro” şirkətinin əkin sahələrində - zeytun bağlarında keçirilib. Burada mütəxəssislər sahəvi koordinatlarla işləmək, məhsuldarlığın və hadisə nəticəsində dəymiş zərərin hesablanması, əkin sahəsinə baxış keçirilməsi kimi mövzularla tanış olublar.

Təlimlərin yekununda iştirakçılar müvafiq ədəbiyyatla təmin ediliblər.

Qeyd edək ki, təlimləri uğurla bitirən mütəxəssislər, Dövlət İmtahan Mərkəzi tərəfindən təşkil edilən imtahana qatılacaq. İmtahanda uğurlu nəticə göstərən şəxslərə müstəqil aqrar sığorta eksperti statusu və müvafiq sertifikat veriləcək.

Həmin ekspertlər Azərbaycan Mərkəzi Bankının müvafiq reyestrinə daxil edilərək fəaliyyətə başlayacaqlar.