Erik ten Haq “Şeffild Yunayted” üzərində əzmkar qələbədən danışdı

“Mançester Yunayted”in baş məşqçisi Erik ten Haq Premyer Liqanın 29-cu turunun autsayder “Şeffild Yunayted”lə ev oyununu (4:2) şərh edib.

Arena.az məlumat verir ki, “qırmızı şeytanlar” doğma meydanda iki dəfə hesabda geri düşsələr də, yekunda əzmkar qələbəni bayram edə biliblər.

Matçdan sonra Erik ten Haq jurnalistlərə açıqlamasında bunları söyləyib:

“Bu gün çox nikbinlik vardı. Komanda iki dəfə büdrədikdən sonra mübarizəni davam etdirərək möhkəmlik nümayiş etdirdi. Təlaş gördümmü? Yox, qətiyyən, biz çox mütəşəkkil idik. Oyun boyu qol imkanları yaratmağa davam etdik.

Amma mənfi cəhətləri də vardı. Biz onlara üstünlük verdik, bu, baş verməməlidir – bu, yolverilməzdir, biz bundan dərs almalıyıq. Amma mən qələbəyə şadam və biz davam etməliyik”, – BBC niderlandlı mütəxəssisdən sitat gətirir.

33 oyundan 53 xal toplamış “Mançester Yunayted” Premyer Liqanın yarış cədvəlində 6-cı pillədə qərarlaşıb. “Şeffild Yunayted” isə 34 oyundan 16 xalla yarış cədvəlinin sonuncu, 20-ci pilləsindədir.

Premyer Liqanın liderlər qrupu isə belə sıralanıb:
34 oyundan 77 xal toplamış “Arsenal” şərti liderdir. Eyni miqdarda oyundan sonra “Liverpul yarış cədvəlində 74 xalla şərti olaraq 2-ci pillədə qərarlaşıb. “Mançester Siti” isə 32 oyundan 73 xalla şərti olaraq 3-cü pillədə qərarlaşıb və Premyer Liqanın mümkün lideridir.