Qazaxıstanda ikinci daşqın dalğası gözlənilir

Qazaxıstan hakimiyyəti yaxın vaxtlarda ölkənin qərbində ikinci daşqın dalğasının baş verə biləcəyini proqnozlaşdırır.

Redaktor.az xəbər verir ki, bu barədə Baş nazir Oljas Bektenovun Atırau vilayətinə səfərinin yekunları üzrə respublika hökumətinin mətbuat xidməti məlumat yayıb.

“Rayon mərkəzində Oljas Bektenov yaşayış massivlərinin istehkamlarına baxış zamanı Atırau şəhərinin proqnozlaşdırılan ikinci daşqın dalğasına hazırlığını qiymətləndirdi. Qərbdə Rusiya Federasiyasının İriklinski su anbarından suyun buraxılması, eləcə də böyük yan qollarının Jayk çayına böyük daşqınları və müvafiq olaraq suyun səviyyəsinin artması ilə əlaqədar vəziyyət çətin olaraq qalır” - məlumatda deyilir.

Mətbuat xidməti xatırladıb ki, Qərbi Qazaxıstan vilayətində daşqınların pik nöqtəsindən sonra sel axını çay yatağı ilə Atırau vilayətinə doğru hərəkət edərək Xəzər dənizinə tökülür. Belə ki, son 24 saat ərzində Qərbi Qazaxıstan vilayətindən gələn su axını ilə Atırauda 6 sm-lik artım qeydə alınıb.

Hökumət başçısı daşqınlara qarşı mübarizə üçün qüvvələrin artırılması, o cümlədən daşqınla bağlı vəziyyətin sabitləşdiyi rayonlardan Atırau vilayətinə hərbi personalın və texnikanın operativ şəkildə köçürülməsini təmin etməyi tapşırıb.

T.İSMAYIL