Voleybol: Mövsümə yekun vuruldu, ən yaxşılar açıqlandı

Voleybol üzrə qadın və kişilər arasında təşkil olunmuş Azərbaycan çempionatında (Yüksək Liqa) 2023/2024 mövsümünə yekun vurulub.

Arena.az xəbər verir ki, ötən gün Bakı İdman Sarayında qadınların final matçı baş tutub.

“Abşeron”u 3:1 hesabı ilə məğlub edən “Azərreyl” ölkə çempionu adını qazanıb.

Final matçından sonra mükafatlandırma mərasimi başlayıb. Çıxış edən Milli Olimpiya Komitəsinin vitse-prezidenti Çingiz Hüseynzadə və AVF-nin prezidenti Şahin Bağırov mükafatçıları təbrik edib, onlara uğurlar arzulayıblar.

Daha sonra çempionatda fərqlənən voleybolçulara “Ən yaxşı oyunçu” mükafatları təqdim olunub. Ardından qaliblərə kubok və medallar verilib. Mükafatları Azərbaycan Milli Olimpiya Komitəsinin (MOK) vitse-prezidenti cənab Çingiz Hüseynzadə, MOK-un baş katibi Azər Əliyev, AVF-nin prezidenti Şahin Bağırov, Gürcüstan Voleybol Federasiyasının prezidenti Georgi Kartvelişvili, AVF-nin vitse-prezidentləri Faiq Qarayev və Bəhruz Quliyev, baş katib Faiq Orucov, İdarə heyətinin üzvləri Günay Salamova, Elçin Ağakişiyev, Zaur Axundov, İlqar Nuriyev təqdim ediblər.

Beləliklə, kişi voleybolçuların birinciliyinin çempionu “Azərreyl”ə qızıl medal və kubok, “Murov”a gümüş, “Neftçi”yə isə bürünc medallar təqdim edilib.

Qadınların çempionatının qalibi olan “Azərreyl”ə qızıl medal və kubok, “Abşeron”a gümüş, “Murov”a isə bürünc medallar verilib.

Sonda qaliblərlə xatirə şəkli çəkdirilib və Azərbaycan çempionatının 2023/2024 illər mövsümü bağlı elan olunub.

Mövsümün ən yaxşıları açıqlandı

Yeri gəlmişkən, Azərbaycan çempionatının ən yaxşı oyunçuları və Rəmzi komandası (“Dream team”) da bəlli olub.

Kişilər voleybolçular arasında fərqlənən oyunçular:

“Ən dəyərli oyunçu” (MVP) – Sergey Platonenkov (“Azərreyl”)
“Ən gənc və perspektivli oyunçu” – Nihad Qasımov (“Murov”)

Simvolik komanda:
“Ən yaxşı toppaylayıcı” – Mehdi Ablu (“Murov”)
“Ən yaxşı hücumçu” – Andrey Melnikov (“Azərreyl”), Vladislav Kunçenko (“Murov”)
“Ən yaxşı libero” – Emil Abdullayev (“Neftçi”)
“Ən yaxşı blokçu” – Mehdi Cəfərvənd (“Azərreyl”), Mohsen Vazehi (“Neftçi”)

Qadın voleybolçular arasında fərqlənən oyunçular:

“Ən dəyərli oyunçu” (MVP) – Katarina Pilepiç (“Azərreyl”)
“Ən gənc və perspektivli oyunçu” – Raziyə Əliyeva (“Azərreyl”)

Simvolik komanda:
“Ən yaxşı toppaylayıcı” – Polina Neykova (“Abşeron”)
“Ən yaxşı hücumçu” – Peralta Luna Vielka (“Azərreyl”), İrina Milanoviç (“Murov”)
“Ən yaxşı libero” – Piyanut Pannoy (“Azərreyl”)
“Ən yaxşı blokçu”– Mariya Kirilyuk (“Abşeron”), Jineyri Martines (“Azərreyl”)
“Ən yaxşı diaqonal oyunçu” – Mariyeta Runyiç (“Abşeron”).