Rauf Əliyev üçün yeni başlanğıc - fərqli və yeniliklərlə dolu

“Komanda ilə birlikdə hazırlıqlarımız davam edir”.

Bunu İdman.bizə Azərbaycan millisinin sabiq futbolçusu Rauf Əliyev deyib.

“Qarabağ” Futbol Akademiyasının aşağı yaş qrupları üzrə məşqçisi Rauf Əliyev ilk dəfə minifutbol üzrə Azərbaycan millisinə çağırılmasını dəyərləndirib. Bu növ üzrə “İnter”də çıxış edən Əliyevin sözlərinə görə, təklif onu bir qədər düşündürsə də, müsbət cavab verib: “Bu mənim üçün maraqlı bir başlanğıc olacaq. Çünki böyük futbolla indiki minifutbol arasında müəyyən fərqlər var. Məşqlərə başlamışıq. Yığmaya ilə birlikdə Monteneqroda hazırlıqlarımız davam edir”.

O bildirib ki, minifutbol yığmasında daha sürətli və hərəkətli olmalıdır: “Veteran futbolçularla birgə çempionatda “İnter”də çıxış edirik. Bu baxımdan futboldan uzaq qalmamışam. Buna görə də müəyyən boşluqları məşqlərlə aradan qaldırmaq olar. Təbii ki, çətinliklər olacaq. Amma bunun öhtəsindən gəlməliyəm. Fərqli və yeniliklərlə dolu bir dönəm olacağını düşünürəm”.

Qeyd edək ki, yığma aprelin 30-da Serbiya, Bosniya və Herseqovina, Rumıniya, Monteneqro və Albaniyanın qatılacağı turnirdə iştirak edəcək.

Banuçiçək Hüseynli
İdman.biz