UEFA həftənin ən yaxşısı adına bütün namizədləri açıqladı

UEFA bu həftə baş tutan avrokubok oyunlarından sonra həftənin oyunçusu adına namizədlərin siyahısını açıqlayıb.

Arena.az xəbər verir ki, hər üç qitəmiqyaslı turnirin ən yaxşısı adına 4 namizəd var.

Çempionlar Liqasında namizədlər bunlardır: Yozua Kimmix (“Bayern”, Almaniya), Yulian Brandt (“Borussiya”, Dortmund, Almaniya), Usman Dembele (PSJ, Fransa), Federiko Valverde (“Real”, İspaniya).

Kimmix “Arsenal”a 1:0 hesabıyla qalib gəldikləri ev oyununda qələbə qolunun müəllifi olub. Üstəlik o, 11,56 km məsafə qət edib, ötürmələrinin isə 97 faizi dəqiq olub.

Brandt “Atletiko” üzərində 4:2 hesablı qələbəyə 1 qolla töhfə verib. Onun bu oyundakı ötürmələrinin 88 faizi dəqiq olub. Alman futbolçu matç ərzində 11,46 km məsafə qət edib.

Dembele “Barselona”nı səfərdə 4:1 hesabıyla məğlub etdikləri oyunda 1 qolla yadda qalıb.

Valverde isə “Mançester Siti”ni mübarizədən kənarlaşdırdıqları səfər matçında 13,99 məsafə qət edib, ötürmələrinin 89 faizi dəqiq olub.

Avropa Liqasında həftənin ən yaxşısı adına namizədlər bunlardır: Canluka Mançini (“Roma”, İtaliya), Berat Cimsiti (“Atalanta”, İtaliya), Matey Kovar (“Bayer”, Almaniya), Cordan Veretu (“Olimpik”, Marsel, Fransa).

Mançini “Milan”a 2:1 hesabıyla qalib gəldikləri ev oyununda ilk qolun müəllifi olub.

Cimsitinin “Liverpul”a evdə 0:1 hesabıyla uduzduqları matçdakı ötürmələrinin 73 faizi dəqiq olub.

Kovar “Vest Hem”lə səfər oyununda 5 seyvlə yadda qalıb.

Veretu isə “Benfika”nı mübarizədən kənarlaşdırdıqları cavab matçında 76 faizlik dəqiq ötürmə ilə diqqət mərkəzinə düşüb.

Avropa Konfrans Liqasında da həftənin ən yaxşı oyunçusu adına bunlar namizədlər məlumdur: Ferran Yutqla (“Brügge”, Belçika), Metti Keş (“Aston Villa”, İngiltərə), Kristiano Biraqi (“Fiorentina”, İtaliya), Kostas Tsolakis (“Olimpiakos”, Yunanıstan).

Yutqla PAOK üzərində qazanılmış 2:0 hesablı qələbədə dublla pay sahibi olub.

Keş “Lill”i mübarizədən kənarlaşdırdıqları səfər oyununda 1 qol vurub. Üstəlik, onun ötürmələrinin 94 faizi dəqiq olub.

Biraqi “Viktoriya” ilə ev oyununda (2:0) 1 qol vurub, ötürmələrinin 89 faizi dəqiq olub.

Tsolakis isə “Fənərbaxça”ya penaltilərlə qalib gəldikləri oyunda önəmli qurtarışları ilə əsas pay sahibi olub.

Qaliblər UEFA-nın rəsmi saytında azarkeşlər arasındakı səsvermənin yekununa əsasən müəyyənləşəcəklər.