Dövlət Departamenti: Biz Azərbaycan və Ermənistanın sülh səylərini qətiyyətlə dəstəkləyirik

Vaşinqton, 18 aprel, AZƏRTAC

“Biz Azərbaycan və Ermənistanın davamlı və şərəfli sülhə nail olmaq səylərini qətiyyətlə dəstəkləyirik və bu prosesin asanlaşdırılmasına yardımı davam etməyə hazırıq”.

AZƏRTAC-ın ABŞ bürosu xəbər verir ki, bu fikirləri ABŞ Dövlət Departamentinin sözçüsünün birinci müavini Vedant Patel jurnalistlər üçün keçirilən brifinqdə Rusiya sülhməramlılarının Azərbaycan ərazilərindən çıxarılmasına dair suala cavabında deyib.

Onun sözlərinə görə, ABŞ 2020-ci ildə Qarabağda döyüşlərə son qoyan və həmin bölgədə Rusiya qoşunlarının yerləşdirilməsini nəzərdə tutan üçtərəfli razılaşmanın tərəfi olmayıb. “Açığı, biz Rusiya hərbçilərinin daha dinc və stabil Cənubi Qafqaz regionu üçün töhfə verdiyini göstərən heç nə görməmişik”, - deyə V.Patel qeyd edib.

Məlahət Nəcəfova

AZƏRTAC-ın xüsusi müxbiri

Vaşinqton