Qızıl Aypara Cəmiyyətinin həbsdə olan bölmə sədri Ali Məhkəməyə müraciət etdi

Bakıda dələduzluqda təqsirləndirilən Ülviyyə Balayevanın barəsindəki məhkəmə qərarından kassasiya şikayəti verilib.


Pravda.az-ın əldə etdiyi məlumata görə, şikayət Ali Məhkəmənin hakimi Əziz Seyidovun sədrliyi ilə araşdırılacaq.


Məhkəmənin hazırlıq iclası aprelin 17-nə təyin edilib.


Xatırlatma: Bakı Apellyasiya Məhkəməsinin qərarı ilə onun apellyasiya şikayəti qismən təmin edilib, Xəzər Rayon Məhkəməsinin çıxardığı hökm dəyişdirilib. Təqsirləndirilən şəxs barəsində olan cinayət işi üzrə onun zərərçəkmişlərdən birinin 5 000 manat pulunu ələ keçirməklə dələduzluq etməsi faktında cinayət hadisəsi olmadığından həmin epizodda cinayət təqibinə xitam verilib. Digər zərərçəkmiş şəxsin hazırki işdə zərərçəkmiş şəxs qismində iştirakına xitam verilib. Hökm qalan hissədə dəyişdirilmədən saxlanılıb.

Qeyd: Daxili İşlər Nazirliyinin 2022-ci ilin yayıda yaydığı məlumata əsasən, Şirvan şəhər ərazisində vətəndaşları dələduzluq yolu ilə aldadan və bununla da zərərçəkənlərin xeyli miqdarda pulunu mənimsəyən şəxsin saxlanılaraq məsuliyyətə cəlb olunması istiqamətində əməliyyat tədbiri həyata keçirilib. Əməliyyat tədbiri nəticəsində şəhər sakini Ü.Balayeva saxlanılıb.

Araşdırmalar zamanı məlum olub ki, Ü.Balayeva şəhər sakini olan bir vətəndaşın etibarından istifadə edərək, ona yüksək məvacibli yaxşı işlə təmin edəcəyi barədə vədlər verərək, onun 10000 manat pulunu dələduzluq yolu ilə ələ keçirib.

İttihama görə, qadın 11 vətəndaşa qarşı 43 min manatdan çox dələduzluq edib.

Xatırlatma: Ü.Balayeva Azərbaycan Qızıl Aypara Cəmiyyətinin Şirvan bölməsinin sədri vəzifəsində çalışıb.

Kamal Məmmədov 





Həmyerlilərini güllələyərək öldürən şəxslərdən xəbər var

Tərtər rayonunda qəsdən adam öldürməkdə ittiham olunan Sənan Ağazadə və Sərvər Hüseynovun barəsindəki qərardan verilən kassasiya şikayəti üzrə məhkəmə iclasının vaxtı məlum olub.

Pravda.az-ın əldə etdiyi məlumata görə, məhkəmənin ilkin hazırlıq iclası aprelin 17-nə təyin edilib.

Şikayət hakim Nazim Mövsümovun sədrliyi ilə araşdırılacaq.

Gəncə Ağır Cinayətlər Məhkəməsinin hökmü ilə Sənan Ağazadə 16 il 6 ay və Sərvər Hüseynov isə 15 il müddətinə azadlıqdan məhrum edilib.

İttihama görə, hadisə 2019-cu ilin dekabrın 9-da Tərtər rayonunda baş verib. Rayon sakini Mansur Behbudovun qırma yarası ilə xəstəxanaya gətirilib.

Araşdırmalarla hadisənin münaqişə zəminində rayonun Seydimli kənd sakini, əvvəllər məhkum olunmuş Sənan Ağazadə tərəfindən törədildiyi müəyyən edilib. Təxirəsalınmaz istintaq və əməliyyat-axtarış tədbirləri ilə Sənan Ağazadənin həmin il dekabrın 11-də Binəqədi rayonu ərazisində “Priora” markalı avtomobildə olması müəyyən edilib. Məsuliyyətdən yayınmaq üçün paytaxt Bakıya qaçan şəxs daxili işlər orqanlarının əməkdaşlarının həyata keçirdikləri uğurlu əməliyyat nəticəsində tutulub. Polis əməkdaşları tərəfindən Sənan Ağazadə və onunla birlikdə olan daha 2 nəfər həmin nəqliyyat vasitəsində saxlanılması təmin edilib. Sənan Ağazadə saxlanılan zaman ondan lüləsi kəsilmiş ov tüfəngi, 6 ədəd patron, 1 ədəd bıçaq, sərnişinlərin birindən isə psixotrop maddə olan 29 ədəd “metanarol” və 11 ədəd “deksanmetazon” həbi aşkar edilərək götürülüb. Onunla birgə Sərvər Hüseynova da ittiham verilib.