Sovet tankları ilə varlanan milyarder: Avropada hər kəs ondan danışır

Ukraynaya silah tədarükü sayəsində sovet texnikasını təmir edən Çexiyanın “Excalibur Army” şirkəti bir milyard dollar sərvət qazanıb.

Publika.az xəbər verir ki, bu barədə “Bloomberg” yazıb.

Çexiyanın Şternberk şəhərinin kənarında yerləşən zavod İkinci Dünya Müharibəsi zamanı alman avadanlıqlarının təmiri üçün istifadə edilib, lakin hazırda Ukrayna münaqişəsi üçün avadanlıq istehsal edən və sahibini milyarderə çevirən iri müəssisənin bir hissəsidir.

Mixal Strnad adlı sahibkar sovet dövründən qalma paslanmış tankları alıb və onları təmir etdirib. 2022-ci ilin fevralında Ukrayna münaqişəsinin başlanmasından bəri onun biznesinə yüksək tələbat var.

“Excalibur Army” ən gəlirli müəssisə hesab olunur. Şirkətin məlumatına görə, 2023-cü ildə gəlir 1,73 milyard avro təşkil edib ki, bu da 2021-ci illə müqayisədə üç dəfə çoxdur. “Bloomberg Billionaires Ranking”-ə görə, biznesin hazırkı rəhbəri Mixal Strnadın sərvəti 5 milyard dollar olaraq qiymətləndirilir.