Qevondyan: “Ermənistana verilən bu sual yersizdir”

“Ermənistanın təhlükəsizliyə ehtiyacı olduğu bir vaxtda bu böyük fürsəti məhz Avropanın müşahidəçi missiyası təmin etdi. Xarici siyasətini şaxələndirmək məntiqinə əsaslanan Ermənistan bu baxımdan maraqları Qərb oyunçularının maraqları ilə üst-üstə düşdüyündən müəyyən addımlar atır”.

KONKRET.az xəbər verir ki, bu fikirləri politoloq Robert Qevondyan Ermənistanla Avropa İttifaqı arasında son zamanlar inkişaf edən münasibətləri şərh edərkən bildirib.

“Oxşar vəziyyət 11 il əvvəl yaranmışdı, lakin 2013-cü ildə Ermənistanın o vaxtkı rəhbərliyi birdən-birə fərqli qərar verdi, nəticədə münasibətlərin inkişafı bir qədər ləngidi”.

Qərb tərəfdaşları ilə münasibətlərdə təhlükəsizliyin spesifik komponentinə toxunan politoloq vurğulayıb ki, Aİ hələ də təhlükəsizliyi təmin edən güc mərkəzi olmasa da, son vaxtlar, xüsusən də Rusiya-Ukrayna müharibəsindən sonra ittifaqın bəzi ölkələri təhlükəsizlik imkanlarının yaradılmasına yönəlmiş tədbirləri uğurla həyata keçirir.

“Bu baxımdan Ermənistan artıq müəyyən dəstək alır, xüsusən də Fransa ilə əməkdaşlıq edir. Və ola bilsin ki, gələcəkdə bu təhlükəsizlik məsələsi digər dövlətləri də əhatə edəcək. Lakin nəzərə alaq ki, Aİ NATO-nun himayəsindədir və Ermənistan bu gün Şimali Atlantika Alyansına dərhal daxil olmağa can atmasa da, Aİ-nin ayrı-ayrı dövlətləri ilə sıx əlaqələri inkişaf etdirir. Proses belə davam edərsə, Ermənistan NATO resurslarının ikinci dərəcəli istifadəçisi kimi başqa imkanlar əldə edəcək”, – politoloq bildirib.

Aİ-nin Ermənistan sərhədlərində müşahidə missiyasının fəaliyyətindən danışan Qevondyan vurğulayıb ki, “Bu missiya daha iki il uzadılacaq. Ermənistan hər iki tərəfin maraqlarının mütləq üst-üstə düşdüyünə əsaslanaraq bu fürsətdən istifadə etməlidir”, – həmsöhbət qeyd edib.

Qevondyan əlavə edib ki, Ermənistanla Avropa İttifaqı arasında münasibətlərin möhkəmləndirilməsi üçüncü ölkəyə, xüsusən də İrana qarşı yönəlməyib.

“Son vaxtlar İranın müxtəlif rəsmiləri dəfələrlə bəyan ediblər ki, bəzi Avropa ölkələrinin və Qərb formatlarının Ermənistan məsələsinə yanaşmaları İranın mövqeyinə yüz faiz uyğundur. Yalnız Avropa Birliyinin təhlükəsizliyinin təminatçısı olan və bu strukturun maraqlarına xidmət edən NATO İran üçün müəyyən problemlər yarada bilər. Bu baxımdan qonşu ölkənin təhlükəsizlik komponenti ilə bağlı müəyyən narahatlığı təbiidir.

Amma Ermənistan qoşulmamaq siyasətini davam etdirir. Buna baxmayaraq, İranla razılaşmalar nəinki mümkündür, hətta bir çox məsələlərdə bu, artıq reallıqdır. İqtisadi komponentə gəlincə, bu gün İranın bununla bağlı maraqları da bizim maraqlarımızla üst-üstə düşür, çünki İran Ermənistana Şimal-Cənub dəhlizi boyunca resursların, texnoloji və digər imkanların daşınması üçün tranzit marşrut kimi baxır.

Alternativ yol kimi Ermənistan yalnız qonşu ölkə üçün faydalı ola bilər”, – politoloq bildirib.

Ermənistan-Aİ iqtisadi əməkdaşlığına toxunan Qevondyan vurğulayıb ki, Avropa məkanına inteqrasiya bir günün, hətta bir ilin məsələsi deyil.

“Ermənistanın bu gün Avropa iqtisadiyyatına tam inteqrasiya etməyə hazır olub-olmaması ilə bağlı sual yersizdir, çünki heç bir dövlət dərhal inteqrasiya prosesinə tam hazır deyil. Hazır olanda dərhal Avropanın bir hissəsinə çevriləcəyik.

Dövlətlər adətən uzun müddətli inteqrasiya prosesindən keçir və bu prosesdə müxtəlif sahələrdə islahatlar aparır, standartlara əməl edir, məhsulun keyfiyyətini artırır, qarşılıqlı ticarət sahəsində razılaşmalar əldə edirlər. Bu proses illər çəkir. Ölkəmiz bu prosesə başlamağa hazırdır. Eyni zamanda, Aİ-nin tələblərini və Qərblə ticarət şərtlərini Aİİ-də mövcud olan standart və tələblərlə birləşdirmək mümkün deyil. Biz uzun bir yolun başlanğıcındayıq”, – həmsöhbətimiz aydınlıq gətirib.

Qevondyan xatırladıb ki, Ermənistanın Aİ ölkələri ilə viza rejiminin liberallaşdırılması prosesi artıq başlayıb. Bu yaxınlarda Ermənistan xarici işlər naziri bu məsələni müxtəlif Avropa ölkələrinin tərəfdaş nazirləri ilə müzakirə edib ki, bu da viza liberallaşdırılmasını yaxın gələcəkdə mümkün edir.

“Nəzərə alsaq ki, qonşu Gürcüstanda bu proses artıq həyata keçirilib və Ermənistanın demokratiya baxımından imkanlarının daha böyük olduğunu nəzərə alsaq, viza liberallaşdırılması rejiminin yaradılmasına iki il vaxt sərf edən Gürcüstandan fərqli olaraq, ölkəmiz bu yolla daha sürətlə gedə bilər”, – deyə politoloq yekunlaşdırıb.

Natiq Səlim,

KONKRET.az