İrəvan “Krokus”la bağlı bəyanatı rədd etdi: Kreml necə cəzalandıracaq?

Xəbər verdiyimiz kimi, KTMT-yə üzv ölkələrin parlament nümayəndə heyətləri birgə bəyanat yayaraq, “Krokus Siti Holl”da törədilən terror aktını pisləyiblər. Ermənistan isə KTMT Parlament Assambleyasının bu bəyanatına qoşulmayıb. Dünyanın hər bir yerində terrorun birmənalı olaraq pislənilməsinə baxmayaraq, İrəvan bundan imtina edib.

Maraqlıdır, bu, son dövrlər daha da gərginləşən Rusiya-Ermənistan münasibətləri ilə bağlıdır, yoxsa İrəvanın terrora dəstəyini ifadə edir?

Politoloq Tofiq Abbasov Publika.az-a bildirib ki, bu, hər iki məqamla bilavasitə əlaqəlidir.

Politoloqun sözlərinə görə, bəlli olan Ermənistanın başıpozuq siyasət yeritməsidir:

“Artıq neçə illərdir görürük ki, Ermənistan regionda daimi gərginliyi saxlayır. Digər tərəfdən, Azərbaycan xalqına, dövlətinə qarşı törətdikləri cinayətlərin hamısında terror tərkibli faktlar var. Cənubi Qafqazda nə dərəcədə pozucu fəaliyyətini qüvvədə saxlamaq niyyətində olduğuna da şahidik. Bütün bunların arxasında erməni siyasi ənənəsinin xüsusiyyətləri durur. Erməni siyasəti qonşuluq, sağlam münasibətlər rejiminə hazır olmadığını nümayiş etdirib. Digər tərəfdən, terror məsələsinə bel bağlayıb. Ermənistanın gördüyü işlər, törətdiyi əməllər hamısı birmənalı şəkildə cinayət tərkiblidir. Ermənilərin Xocalıdakı soyqırımı əməlləri, mülki vətəndaşlarımıza qarşı zorakılığı, onların əllərinin bağlı olduğu halda öldürülməsi və kortəbii şəkildə torpağa basdırılması terrordur. İndi də həmin kütləvi məzarları aşkar edirik. Onlar cəbhə xəttində aramsız və davamlı təxribatlar törədiblər. Keçmiş təmas xəttində olan erməni oyunbazlığı öz başlarına oyun gətirdi. Bütün bu proseslərin hamısının kökündə erməni xisləti və onun daxilində olan qeyri-sağlam ruhdur”.