ABŞ hakimiyyəti xarici agentlər haqqında qanunun təşviqinə cavabdeh olan gürcü siyasətçilərinə qarşı sanksiyalar tətbiq etmək üçün qanun layihəsi hazırlayır. Bu barədə “Politico” sənəd layihəsinə istinadən məlumat yayıb.
Sənəddə qeyd edilir ki, sanksiyalara mübahisəli qanunun qəbulunda iştirak edən məmurların aktivlərinin dondurulması və səyahət qadağaları daxil ola bilər. Qanun layihəsinin müəllifləri həmçinin Gürcüstanın “Amerika və digər Qərbin demokratiyanı təşviq edən təşkilatlarına açıq şəkildə hücum etməsindən” və “Rusiya və Çinlə əlaqələri gücləndirməyə çalışmasından” narahatlığını ifadə edirlər.
Gürcüstanın baş naziri İrakli Kobaxidze (hakim “Gürcü arzusu” partiyasının nümayəndəsi) bildirib ki, Tbilisidə akkreditə olunmuş xarici diplomatlar “Xarici agentlər haqqında” qanunu müzakirə etməkdən imtina ediblər.
Xarici təsirin şəffaflığı haqqında qanun Gürcüstan parlamenti tərəfindən üç oxunuşda qəbul edilib. Qanun xaricdən maliyyə alan qeyri-hökumət təşkilatlarının xarici agent kimi qeydiyyatdan keçməsini tələb edir.
Qanun Gürcüstanda müstəqil media və qeyri-hökumət təşkilatlarının fəaliyyətini məhdudlaşdıracağından ehtiyat edən müxalifət və beynəlxalq təşkilatların tənqidinə səbəb olub.
Xatırladaq ki, Gürcüstan prezidenti Salome Zurabişvili ölkə parlamentinin qəbul etdiyi xarici agentlər haqqında qanuna veto qoymuş, onu konstitusiyaya zidd və Avropa standartlarına zidd adlandırmışdı. Bununla belə, “Gürcü arzusu” prezidentin vetosunu ləğv edəcəklərini bəyan edib – bunun üçün deputatların 77 səsi, hakim fraksiyada isə 84 nəfər var.
Ülviyyə, Hurriyyet.az
