ABŞ və İran bu həftə Omanda Yaxın Şərqdə gərginliyin artmasının qarşısını almaq üçün vasitəçilər yolu ilə danışıqlar aparıb.
Yeniavaz.com xəbər verir ki, bu barədə cümə günü “Axios” portalı mənbələrə istinadla məlumat yayıb.
Məlumata görə, Amerika tərəfdən məsləhətləşmələrdə Ağ Evin Milli Təhlükəsizlik Şurasının Yaxın Şərq və Şimali Afrika üzrə koordinatoru Brett Makqurk və ABŞ-nin İran üzrə xüsusi nümayəndəsi vəzifəsini icra edən Abram Peyli iştirak edib.
Mənbə qeyd edir ki, İrandan məsləhətləşmələrdə kimin iştirak etdiyi məlum deyil. Onun sözlərinə görə, məsləhətləşmələr İran və onun tərəfdar qüvvələrinin regionda mümkün hərəkətlərinin nəticələrinə, habelə Tehranın nüvə proqramı ilə bağlı ABŞ-nin narahatlığına həsr olunub.
Digər tərəfdən, “Axios” portal belə məsləhətləşmələrin 2024-cü ilin yanvarından bəri ilk dəfə keçirildiyini vurğulayıb. Portal qeyd edir ki, ABŞ və İran arasında Omanda vasitəçilər yolu ilə danışıqlar Tehranın aprelin 13-də İsrail ərazisinə kütləvi raket və pilotsuz təyyarə zərbələri endirməsindən bir aydan çox sonra baş tutub.

• tags
• tags