Şimali Koreya lideri Kim Çen In kiçik silah zavodunu ziyarət edib və səfəri zamanı Şimali Koreyada istehsal edilən yeni snayper tüfənginə xüsusi maraq göstərib.
Bu barədə KXDR Mərkəzi Teleqraf Agentliyi məlumat yayıb.
“O, yeni snayper tüfənginə maraq göstərdi və ən yaxşı xüsusiyyətlərə malik qürurverici snayper tüfəngi hazırladıqlarına görə Şimali Koreyanın alim və texniki işçilərini yüksək qiymətləndirdi”, - deyə agentliyin açıqlamasında bildirilib.
Qeyd olunub ki, Şimali Koreya lideri zavoda səfəri zamanı dövlətin atıcı silahları tamamilə yeniləmək niyyətini xüsusilə vurğulayıb.
Bundan əvvəl Kim Çen In bəyan etmişdi ki, Rusiya ordusu və xalqı imperializmin hegemon siyasətini və yumruq gücünü məğlub etməlidir. Kim Çen In qeyd edib ki, bu gün Rusiya düşmən qüvvələrin pis çağırışlarına və təhdidlərinə müqavimət göstərir, öz hüquqları, regionda sülh və təhlükəsizliyi təmin etmək üçün mübarizə aparır.
