Tramp Avropa ölkələrini Ukraynaya yardım üçün ABŞ-dan az xərclədiklərinə görə qınayıb

ABŞ-ın keçmiş prezidenti Donald Tramp Avropa ölkələrini Kiyevə ABŞ tərəfindən göstəriləndən az olmayan yardım göstərməyə çağırıb. Bizimyol.info xəbər verir ki, bu barədə Tramp "Truth Social"da yazıb. "Avropa niyə Ukraynaya kömək üçün daha çox pul ayırmır? Nə üçün Avropa Amerika Birləşmiş Ştatlarının ayırdığı yardımın həcmini bərabərləşdirə və ya ona yaxınlaşa bilmir? Davam et, Avropa!", - deyə o, sahibi olduğu sosial şəbəkədəki səhifəsində qeyd edib. Onun hesablamalarına görə, ABŞ coğrafi cəhətdən Avropa ölkələrindən xeyli uzaqda olmasına baxmayaraq, ABŞ Kiyevə Avropadan 100 milyard dollar çox vəsait ayırıb. Mart ayında Tramp deyib ki, amerikalı vergi ödəyicilərinin Ukraynaya yardım üçün Avropa dövlətlərinin birləşdiyindən daha çox pul ödəməsi ədalətsizlikdir. Rusiya tərəfi dəfələrlə vurğulayıb ki, Qərbin Kiyevə silah göndərməsi və Ukrayna hərbçilərinin təliminə yardım etməsi yalnız münaqişəni uzadır və döyüş meydanında vəziyyəti dəyişmir. Qadir, Bizimyol.info