Xaricdə təhsil almaq istəyənlər nələrə diqqət etməlidir? – Əsas NÜANSLAR

“Abituriyentlər xaricdə universitet seçərkən mütləq şəkildə tələsməməli, həm özü araşdırma apararaq, həm də hər hansı bir mütəxəssisə müraciət edərək, bunu etməlidirlər”.

Bu fikirləri Yenicag.az-a açıqlamasında xaricdə təhsil almaq istəyən abituriyentlərin diqqət etməsi zəruri olan məqamlar haqda danışan təhsil məsələləri üzrə ekspert Adil Vəliyev deyib.

Onun sözlərinə görə, abituriyentlər xaricdə təhsil almaq istədiyi zaman bir çox nüansa diqqət yetirməlidir.

“Xaricdə təhsil almaq istəyənləri iki hissəyə bölmək olar. Abituriyentlərin bəziləri lazım olan balı toplaya bilməyib, Azərbaycan universitetlərinə daxil ola bilmədikdə Türkiyə, Rusiya, Ukrayna kimi ölkələrdə yerləşən bəzi ali təhsil müəssisələrinə üz tuturlar. Burada əsasən qəbul attestatla aparılır. Lakin digər abituriyentlər öz işlərini daha öncədən sırf xaricdə təhsil almaq üçün planlayırlar. Hətta onlar ölkəmizdə Dövlət İmtahan Mərkəzi tərəfindən keçirilən imtahanda iştirak etməkdən imtina belə edir”, – deyə o əlavə edib.

Ekspertin sözlərinə görə, attestatla xaricdə təhsil almaq istəyən gənclər müxtəlif səbəblərdən az bal toplayaraq, ölkəmizdə hər hansı ali təhsil müəssisəsinə qəbul olmaya bilər. “Lakin onlar xaricdə təhsil almaqla bağlı müraciət edərkən bəzi məqamlara xüsusi olaraq diqqət yetirməlidirlər. Xaricdə oxumaq istəyən gənclər təhsilini bitirdikdən sonra ölkəsinə qayıtdıqda onun diplomu tanınmaya bilər. Ona görə də həmin abituriyentlər xaricdə universitet seçərkən mütləq şəkildə tələsməməli, həm özü bir qədər həm araşdırma apararaq, həm də hər hansı bir mütəxəssisə müraciət edərək bunu etməlidirlər”, – deyə o qeyd edib.

Mütəxəssis bildirir ki, abituriyentlər xaricdə təhsil almaq istədiyi universitet haqda məlumat toplamalıdır:

“Təhsil üzrə beynəlxalq axtarış sistemi – “ENİC-NARİC” sistemi var ki, abituriyentlər həmin sistem vasitəsilə təhsil almaq istədiyi universitetin adını axtarışa verərək, həmin ali təhsil ocağının adının çıxması, Azərbaycan Respublikası Elm və Təhsil Nazirliyi tərəfindən tanınması, Təhsildə Keyfiyyət Təminatı Agentliyi tərəfindən təsdiq olunub-olunmamasını yoxlamalıdırlar”.

Ekspert əlavə edib ki, xaricdə alınan distant təhsil ölkəmizdə tanınmır.

“Statistikaya diqqət yetirsək, görərik ki, bəzi şirkətlər attestatla xaricə təhsil almağa göndərdiyi abituriyentlər təhsillərini bitirdikdən sonra vətənə döndükdə onların diplomları tanınmır. Həmin şirkətlər abituriyentlərə müəyyən ödəniş qarşılığında distant təhsilə də cəlb etmək istəyirlər. Lakin qeyd edim ki, distant təhsil ölkəmizdə Elm və Təhsil Nazirliyi tərəfindən tanınmır. Ən əsas məsələlərdən biri də abituriyentlərin universistetlə yanaşı, onların təhsil alacağı ixtisas da önəm daşıyır. Eyni zamanda, gənclər təhsil alacağı ölkənin dilini də müəyyən qədər mənimsəməlidir”, – deyə ekspert yekunlaşdırıb.

İsmayıl Bakuvi